Disa pyetje dhe përgjigje në lidhje me Kurbanin
|
05 Nntor 2011
Sa duhet të jetë nisabi për kurban?
Pyetja:
Esselamu alejkum!
Profesor i nderuar, sa duhet të jetë nisabi (sasi e caktuar e pasurisë), e që të bëhet obligim prerja e Kurbanit?
Përgjigjja:
Bismil-lahirr-rrahmanirr-rrahim
Që kurbani të jetë obligim duhet të plotësohen këto kushte, të jetë musliman, të jetë i lirë ngase robi nuk ka obligim të therë kurban, të jetë në vendlindje, pra të mos jetë në udhëtim, të jetë psikikisht i mençur, të jetë i moshës madhore (pubertet), dhe të plotësojë nisabin. Nisabi është: Sasi e përcaktuar e pasurisë që All-llahu xh.sh. e ka përcaktuar si shenjë që obligonë zeqatin . Nisabi është njëzet (20) mithkal[1] që sipas juristëve të shkollës juridike hanefite[2] është i barabartë me 100 gram ari[3], ngase një mithkal është i barabartë me pesë gram, pra 20 x 5=100 gr ari. Për dallim të zeqatit, te Kurbani nuk është kusht që nisabi të plotësoj një vit.
Allahu e di më se miri!
__________________
[1] Mithkali është dinar nga ari, me të cilën është përcaktuar Nisabi.
[2] Sipas dijetarëve të medhhebit maliki, hanbeli dhe shafi’i një mithkal është i barabartë me 3.60 gram ari.
[3] Këto njëzet mithkalë janë të barabartë për afërsisht me vlerën e 14 lirave osmane.
A lejohet të theret kurban për të vdekurit?
Pyetja:
Esselamu alejkum!
Hoxhë i nderuar, a është e lejueshme të theret kurban për të vdekurin?
Përgjigjja:
I nderuar, nëse i vdekuri gjatë jetës së tij e ka pasur obligim (vaxhib) kurbanin dhe nuk e ka prerë duke qenë i gjallë, ky obligim ka ngelë borxh për të, dhe lejohet për të gjallin, respektivisht trashëgimtarët e tij që të presin kurban për të vdekurin e tyre, në mënyrë që të lirohet nga obligimi. Mirëpo nëse i vdekuri nuk ka pasur obligim kurbanin duke qenë gjallë, sërish lejohet të theret kurban për të, por ky lloj i kurbanit është nga vullneti i trashëgimtarëve të tij, e në këtë rast duhet pasur parasysh gjithnjë një fakt se, së pari, duhet therur kurban për veten e pastaj për të vdekurin. Koha e therjes së kurbanit për të vdekurin është e ngjashme si koha e kurbanit për të gjallin, pra pas namazit të bajramit e deri në ditën e tretë të bajramit në namazin e iqindisë.
Allahu e di më së miri!
Nëse nuk falem, a të pres kurban?
Pyetja:
Esselamu alejkum!
Profesor i nderuar, cili është mendimi juaj rreth atij personi i cili ther kurban, mirë nga ana tjetër ai shpërfill namazin?
Përgjigjja:
Bismil-lahirr-rrahmanirr-rrahim
I nderuar, falja e namazit është farz për besimtarët islam, që nënkupton se për mos kryerjen e farzit ka dënim, kurse dispozita e prerjes së Kurbanit është Vaxhib, që për mos kryerjen e vaxhibit sërish ka dënim. Pra, personi i cili kryen vaxhibin lirohet nga përgjegjësia e vaxhibit, kurse për mos kryerjen e farzit ndëshkohet, pra nuk lirohet nga përgjegjësia. Andaj edhe këto dy çështje janë të ndara dhe nuk lidhen mes veti.
Vallahu ealem!
Therja e kurbanit për familjen
Pyetja:
Esselamu alejkum!
I nderuari hoxhë, jemi një familje katër anëtarëshe (unë, bashkëshortja dhe dy djem) dhe kemi vendosur të presim kurban. A na lejohet neve që për të katërtit të therim vetëm një kurban, apo se duhet për secilin nga një të veçantë? Gjithashtu, a bën që edhe për nënën time të pres kurban, ndonëse ajo jeton me vëllanë?
Përgjigjja:
Bismil-lahirr-rrahmanirr-rrahim
I nderuar, prerja e Kurbanit është vaxhib për ata që kanë mundësi materiale për të prerë. Nëse ju e keni vaxhib kurbanin atëherë duhet të therni kurban, e nëse bashkëshortja e juaj e ka vaxhib edhe ajo duhet të therë kurban për veten e saj, i njëjti rregull vazhdon edhe për fëmijët tuaj. Mirëpo nëse ju therni një kurban për veten tuaj, ai është një kurban dhe nuk mund të jetë më shumë se një.
Çështja tjetër, nëse ju dëshironi të therni një kurban të madh (kafshë të madhe) lejohet që në të të jeni pjesëmarrës të gjithë anëtarët e familjes e edhe nëna e juaj. Nëse nëna e juaj ka pasuri të veten, ajo e ka obligim të therë kurban, e nëse ju keni vendosur që asaj t’ia dhuroni një kurban, nuk prishë punë fare, pra, nuk ka lidhje se ajo jeton me ju apo me vëllanë tuaj, sepse ajo sërish ngelë nëna e juaj, bile do të kisha thënë se në këtë rast keni edhe më shumë obligime ndaj saj. Pra të jem i qartë, një kurban i vogël (dele apo dash) mjafton vetëm për një njeri , kurse një kurban i madh (kafshë e madhe-lopë) mjafton deri për shtatë persona.
Vallahu ealem!
Therja e kurbanit për fëmijë – Akika
Pyetja:
Esselamu alejkum!
Ju përshëndes dhe ju përgëzoj për kontributin tuaj. Kam një pyetje lidhur me kurbanin e Akika’s: Pse për djalin e porsalindur theren dy kurbane e për vajzën një?
Përgjigjja:
Bismil-lahirr-rrahmanirr-rrahim
Falënderimi i takon vetëm Allahut të Madhërishëm, kurse salevatet dhe selamet mbi Muhamed Mustafan s.a.v.s, mbi familjen e tij, sahabët, dhe mbarë besimtarët islam.
I nderuar, fillimisht të theksoj se sipas medh’hebit hanefi, kurbani për lindjen e fëmijës që quhet “El-Akikatu” është i lejuar, por jo edhe i preferuar apo i rekomanduar. Ky mendim mbështetet në faktin se ligjësimi i kurbanit ka abroguar të gjitha kurbanet e tjera, përfshirë edhe kurbanin të quajtur Akika. Ky abrogim mbështetet dhe vërtetohet me fjalën e Aishes r.a., bashkëshortes së Pejgamberit s.a.v.s., e cila ka thënë: “Kurbani (që theret Ditën e Bajramit) ka abroguar të gjitha therjet para saj.”
Kurbani i Akika’s theret ditën e shtatë të lindjes së fëmijës. Sipas mendimit të Imam Malikut për Akikan theret një dele si për mashkull ashtu edhe për femër. Ky mendim mbështetet në hadithin e Ibni Abasit ku thotë se Pejgamberi s.a.v.s. ka prerë për Hasanin dhe për Husejnit (nipat e tij) nga një dash për secilin. E ky është mendimi edhe më racional edhe më i lehtë. Kurse sipas shafive dhe hanbelive për fëmijën mashkull theren dy kurbane e për femrën një. Ky mendim mbështetet në hadithin e Aishes r.a. e cila ka thënë: “Jemi urdhëruar që për vajza të therim një kurban, kurse për djemtë dy kurbanë.” Pra i nderuar, shkurtimisht ky është qëndrimi i dijetarëve islam (fukahave rreth kurbanit të Akika’s).
Vallahu ealem.
